Fir eng gesond
Screen-Life-Balance
vun eise Kanner

Vun 0 bis 3 Joer: de Kontakt mat Ecrane komplett vermeiden

Kanner vu manner wéi dräi Joer léieren haaptsächlech duerch Sënneserfarungen an tëschemënschlech Interaktioune mat Erwuessenen an anere Kanner. An deem Alter droen digital Geräter net zur gudder kognitiver, motorescher a sozialer Entwécklung vum Kand bäi. Dofir sollt ee ganz kleng Kanner vun Ecranen ewechhalen. Aktivitéiten, déi déi fënnef Sënner (kucken, lauschteren, upaken, richen a schmaachen) ureegen, sollt ee virzéien.

Recommandatiounen:

• de Kontakt mat Ecranen (Tëlee, Smartphone,Tablet) vermeiden;
• sensoresch Aktivitéite virzéien, wéi
  Opbauspiller, Lektür, Märercher a Spadséiergäng.

Als Alternativ zu den Ecranen hunn d’Familljenaktivitéiten de Virdeel, dass si d’Wuelbefannen an d’Vertraue stäerken. Kuckt Iech Bicher a Geschichte fir déi ganz Kleng zesummen un, gitt trëppelen an entdeckt d’Ëmwelt. Bildschiermer vermeiden heescht natierlech net, op Videocalls mat de Grousselteren a Frënn vun der Famill ze verzichten.

Vun 3 bis 6 Joer: gëeegent Contenuen auswielen

Vun dräi Joer u kënnt Dir no an no digital Contenuen an d’Aktivitéite vun Ärem Kand aféieren. Elo kënnt Dir gutt Gewunnechten etabléieren: Sicht de Contenu eraus (z. B. edukativ Emissiounen an interaktiv Spiller, déi un den Alter vum Kand ugepasst sinn) a leet am Virfeld d’Zäit virum Bildschierm fest. Fir dass Äert Kand dat Prinzip verënnerlecht, ass et sënnvoll, him d’Grenzen ze erklären, z. B. eng Folleg vu senger Liblings-Emissioun. Schwätzt mat Ärem Kand iwwer dat, wat et kuckt. Et versteet dann de Inhalt besser a mécht d’Verbindung tëschent der virtueller an der realer Welt

Recommandatiounen:

• de Kanner d’Limitten erklären an hinne Bescheed soen, éier een den Ecran ausmécht;
• altersgerecht Contenuen auswielen an de Gebrauch begleeden;
• sech vergewësseren, dass digital Medien ënnert Ärer Opsiicht a gemeinsame Raim benotzt ginn;
• digital Apparater an Inhalter, déi net op Interaktivitéit opbauen (Tëlee a YouTube), vermeiden;
• keng eege Spillkonsol viru 6 Joer erlaben.

Hutt Dir un Hörgeschichten als Alternativ zu Ecranen geduecht? Lauschtert Äert Kand vill Kannerlidder an Hörgeschichten kann dëst d’Erfarung vun Ärem Kand beräicheren, et un d’Sprooch eruféieren an d’Konzentratioun fërderen. Privilegéiert och weiderhi Gesellschaftsspiller, d’Virliese vu Geschichten an Aktivitéiten ënnert fräiem Himmel.

Moossnamen am Beräich vun der Educatioun

Verbuet vun Ecranen an de Bildungs- a Betreiungsstrukture fir Kanner, déi nach net an d’Schoul ginn

De Ministère wäert d’Notzung vu Bildschiermer an de Bildungs- a Betreiungsstrukture fir Kanner (Crèchen) verbidden. Dëst gëtt och an de Konventioune mat de Prestatairen ab Januar 2025 festgehalen an an den Nationale Referenzkader iwwert déi non-formal Bildung ageschriwwen.

Fërderung vun de Bëschcrèchen

Bëschcrèchë sollen de Kanner hir Ëmwelt bewosst maachen an se dozou animéieren, sech ze beweegen an Zäit an der Natur ze verbréngen. Bëschcrèchen opzemaache soll duerch eng Erhéijung vu Subventioune fir Gemengen, déi an dës Betreiungsform wëllen investéieren, méi attraktiv ginn.

Beweegen, spillen, liesen: eng „Boîte à outils“ fir Aktivitéiten an der Famill

Den Eltereforum wäert eng Boîte à outils ausschaffe mat Bicher, Gesellschaftsspiller, Iddien, fir zu Beweegung ze animéieren, an engem Recueil mat Inspiratioune fir Famillenaktivitéiten.

Vu 6 bis 9 Joer: den Ëmgang mat digitalen Apparater begleeden

Wann Äert Kand an den 2. Zyklus vun der Grondschoul kënnt, brauch et nach Är Begleedung bei digitale Contenuen. Encadréiert virun de Gebrauch vun Ecranen a verséchert Iech, dass Äert Kand an de gemeinsame Raim, also zum Beispill an der Stuff oder an der Kichen bleift, fir dass et sech net ze vill an eng virtuell Welt zréckzitt. Fir d’Emissiounen oder d’Spiller auszewielen, déi Äert Kand däerf spillen, kënnt Dir Iech op d’Altersrecommandatioune fir Multimedia-Contenue stäipen. De Mindestalter gëtt meeschtens am Eck vum Ecran uginn. Et gëtt awer recommandéiert, bei Ärem Kand ze bleiwe fir ze kucken, ob d’Programmer wierklech un d’Sensibilitéit an d’Maturitéit vun Ärem Kand ugepasst sinn. Virun allem, wann d’Kand schonn eng eege Spillkonsol huet.

Recommandatiounen:

• kloer Reegele fir d’Benotze vun digitalen Apparater opstellen;
• d’Benotze vun den Ecranen a gemeinsame Raim encadréieren;
• d’Apparater, déi Äert Kand gebraucht, esou ariichten, datt den Zougang zu Contenuen ageschränkt an d’Benotzungszäit begrenzt gëtt.

Wann Äert Kand méi grouss gëtt, kann et Alternativen zu den Ecrane bei de Fräizäitaktivitéiten an Ärer Gemeng fannen. Duerch Sport, Musek oder Konscht kann et seng Interessien a seng Kreativitéit weiderentwéckelen, awer och mat Komeroden a sengem Alter zesummen sinn.

Vun 9 bis 12 Joer: de Smartphone evitéieren

Fir Kanner vun 9 Joer u bleiwen d’Recommandatioune bal d’selwecht wéi fir déi méi Jonk. Äert Kand gëtt méi onofhängeg a gëtt besser mat sengem direkte Ëmfeld eens, mee et ass awer nach net räif genuch, fir d’Gefore vum Internet aleng aschätzen ze kënnen. Zéckt net, fir him ze erklären, dass alles, wat online gesat gëtt, an den ëffentleche Beräich ka falen a vu jidderengem op der ganzer Welt ka gekuckt ginn. Och wann Dir se läscht, kënnen Informatiounen oder Fotoen ëmmer nach ouni Ären Accord den Tour vum Internet maachen. Kläert Äert Kand och iwwer falsch Informatiounen op: Et ass nach laang net wouer, well et anzwousch steet! Et ass net einfach, mee et gëtt geroden, Kanner ënner 12 Joer kee Smartphone mat Internetverbindung ze ginn. En einfachen Handy misst duergoen, fir dass et Iech ka kontaktéieren oder dass et wärend sengen Aktivitéiten erreechbar ass.

Recommandatiounen:

• d’Benotze vun den Ecranen a gemeinsame Raim encadréieren;
• Kanner ënner 12 Joer kee Smartphone ginn;
• d’Altersaschränkunge respektéiere bei Multimedia-Contenuen, déi Äert Kand consomméiert;
• Videospiller a Moossen an ënnert der Opsiicht vun engem Erwuessenen erlaben; • op de Gebrauch vum Internet virbereeden

Zu den Alternativen zu den Ecranen, déi un d’Besoinen an d’Interessie vun Ärem Kand ugepasst sinn, gehéiere beräicherend Fräizäitaktivitéiten, mee och Zäit zesummen an der Famill. Dat not Ëmfeld fërdert déi perséinlech Entwécklung an d’Sozialiséierung.

Wéi eng Mesuren an der Educatioun?

Verbuet vum Smartphone an de Grondschoulen

An alle Grondschoule wäert de Smartphone ab Ouschteren 2025 komplett verbuede sinn.

Verbuet vum Smartphone an de Maison-relaisen

D’Notze vum Smartphone an de Maison-relaise gëtt och verbueden.

Eng ugepasste Konfiguratioun vu Microsoft Teams

Plattformen ewéi Microsoft Teams musse verstänneg a begleet agesat ginn, fir hir didaktesch Virdeeler maximal ze notzen. Ab dem zweeten Trimester vum Schouljoer 2024/2025 gëtt d’Chat-Funktioun a Microsoft Teams gespaart an d’Schüler kënnen ouni d’Presenz vun engem Enseignant keng Diskussiounsgruppe méi erstellen.

Ariichte vu Ludothéiken a Maison-relaisen

Gesellschaftsspiller hunn ëmmer eng wichteg Roll am Alldag vu Kanner gespillt a sollen dat och weiderhi maachen. Dowéinst wäert d’Méiglechkeet, eng eege Ludothéik anzeriichten, an d’Konventioune mat de Bildungs- a Betreiungsstrukturen ageschriwwe ginn. D’Kanner kënne sech bei enger Ludothéik Spiller, Geräter oder aner Materialie fir Fräizäitaktivitéite ausléinen.

Vun 12 bis 15 Joer: ze fréi fir d’sozial Medien!

D’Pubertéit ass eng entscheedend Phas an der Entwécklung vun Ärem Kand a senger Autonomie. Et bleift wichteg, kloer Reegelen fir d’Notzung vun digitale Geräter opzestellen. Versicht, mat Ärem Teenager iwwert Applikatiounen, déi hien interesséieren, ze diskutéieren an Iech se zesumme mat him unzekucken. En einfacht Verbuet kéint sech negativ op säi Konsum vun digitale Contenuen auswierken. Vun 13 Joer un ass Ären Teenager prett, fir iwwer de Schutz vu perséinlechen Donnéeën, besonnesch vu Fotoen, déi hien online setzt, opgekläert ze ginn. Dir kënnt en och, ergänzend zu den Informatiounen iwwer d’Riske vum Internet, déi en an der Schoul kritt, sensibiliséieren op d’Gefore vum Cybermobbing, vum Grooming (wann Erwuessener bewosst Mannerjäreger iwwer digital Kanäl kontaktéieren, fir se sexuell ze manipuléieren) a vum Sexting (Austausch vu Contenue mat sexuellem Charakter).

Recommandatiounen:

• op sozial Medie verzichten;
• kloer Reegele fir d’Deele vu perséinlechen Donnéeën a Fotoe festleeën;
• Appe mat Ärem Kand duerchgoen an doriwwer diskutéieren, amplaz se ze verbidden;
• Ären Teenager encouragéieren, sech Iech unzevertrauen, wann en de Besoin verspiert;
• Altersklassifikatioune fir Multimedia-Contenue respektéieren;
• de Wifi (WLAN) nuets ausschalten an dofir suergen, datt Äert Kand genuch Schlof kritt.

Alternativ Aktivitéiten zu den Ecranen hänke vun den Interessie vun Ärem Teenager of. Plangt weiderhin Zäit fir Diskussiounen an Austausch mat him an, fir dass en net zéckt, sech Iech unzevertrauen, wann e Besoin besteet.

Vu 15 Joer un: opmierksam bleiwen

Dir hutt Äert Kand vu Klengem u Schrëtt fir Schrëtt beim Gebrauch vun digitale Geräter begleet. Elo ass et an der Lag, si méi autonom ze benotzen. Bleift wiederhin opmierksam, besonnesch wat d’Notzung vun de soziale Medien ubelaangt, d’Deele vum Privatliewen online an d’Ausufere vun der Bildschiermzäit.

Recommandatiounen:

• disponibel an opmierksam bléiwen, fir kënnen Ënnerstëtzung ze bidden, wann dat sech als néideg erweist;
• op dat digitaalt Wuelbefanne vun Ärem Teenager oppassen;
• Zäit an der Famill verbréngen an de schoulesche Parcours an d’ausserschoulesch Aktivitéite vun Ärem Kand ënnerstëtzen.

Familljenaktivitéiten, wéi Gesellschaftsspiller, Vëlostouren, gemeinsam Ausflich (Concerten, Muséeën, touristesch Visitten asw.), sinn ëmmer flott Alternativen zu Smartphone, Tëlee, Tablet & Co.

Wéi eng Mesuren an der Educatioun?

Physesch Trennung tëscht Schüler a Smartphonë wärend de Coursen am Lycée

Bis d’Päischtvakanz muss all Lycée eng Strategie ausschaffen, fir eng physesch Trennung tëscht dem Schüler a sengem Smartphone wärend dem Cours ze garantéieren. Am Kader vu senger Autonomie kann all Lycée decidéieren, d’Notze vum Smartphone weider ze limitéieren, z. B. fir verschidden Altersgruppen, zu bestëmmten Zäiten oder a spezifesche Beräicher vun der Schoul.

E Pilotprojet géint exzessiv Mediennotzung

De Projet PROTECT geet géint déi exzessiv Mediennotzung vir a setzt op d’Entwécklung vu Kompetenzen an der Regulatioun vun Emotioune bei der perséinlecher Mediennotzung. PROTECT ass vum Centre psychosocial et d’accompagnement scolaires (CePAS) an Zesummenaarbecht mam Zenter fir exzessiivt Verhalen a Verhalenssucht (ZEV) entwéckelt ginn a gëtt och vun dëse begleet. De Projet gëtt am Laf vun dësem Schouljoer op der 6^e an dräi Pilotlycéeën agefouert.

Eng nei Gestioun vun de One2One-Apparater

Vun der Rentrée 2025/2026 u kréien d’Schüler vun den ënneschte Klasse keng iPade méi am Kader vum One2One-Programm zur Verfügung gestallt. Dëst geschitt just op de méi héije Klassen, op deenen d’Schüler schonn eng gewëssen digital Maturitéit erreecht hunn. D’iPade ginn an den ënneschte Klasse weiderhi fir reng pedagogesch Zwecker genotzt, bleiwen awer am Besëtz vun de Lycéeën, déi dës dann och geréieren. D’Konfiguratioun vun den iPaden aus dem One2One-Programm gëtt esou ugepasst, datt keen Zougang zu onpassenden oder oflenkenden Inhalter méi méiglech ass.

Eng méi restriktiv Konfiguratioun vun de WLAN-Netzwierker

Fir d’Schüler besser ze schützen an den Zougang zu onpassenden Inhalter ze vermeiden, ginn d’WLAN-Netzwierker an de Lycéeën esou konfiguréiert, datt eng méi sécher Notzung vun den digitalen Outile garantéiert ass.